Պետք է լրջորեն վերանայել այն մոտեցումները, որոնք կային բանակցային գործընթացում. Շավարշ Քոչարյան

25  տարվա ընթացքում Արցախի ժողովուրդը հստակ ապացուցել է, որ ինքը տեր է իր կայացրած որոշմանը, այսինքն` որպես պետություն Արցախը կայացել է. այսօր լրագրողների հետ զրույցում ասաց արտաքին գործերի փոխնախարար Շավարշ Քոչարյանը և շնորհավորեց Արցախի ժողովրդին անկախության 25-ամյակի կապակցությամբ: Իսկ ապրիլյան պատերազմը, ըստ նրա, ապացուցեց, որ Արցախի ժողովուրդը պատրաստ է ցանկացած արկածախնդրություն հետ մղել:

Խոսելով բանակցային գործընթացի մասին` Քոչարյանը նշեց, որ քսան տարուց ավելի տևած բանակցային գործընթացում Ադրբեջանն ապակառուցողական քաղաքականություն է վարել:

Հարցին, թե արդյո՞ք դիվանագիտական ձախողում չէ, որ այս տարիների ընթացքում որևէ պետություն չի ճանաչել ԼՂՀ-ն, նա պատասխանեց, որ այպիսի խնդիր չի դրվել: «Ադրբեջանի ձևավորած դեստրուկտիվ դիրքորոշումը խոսում է այն մասին, որ այսօր պետք է շատ լրջորեն վերանայել այն մոտեցումները, որոնք կային բանակցային գործընթացում»,- ասաց Քոչարյանը:

Ինչ վերաբերում է հողերը հետ վերադարձնելու խոսակցություններին, ԱԳ փոխնախարարը շեշտեց, որ նման խնդիր երբեք դրված չի եղել: Իսկ թե ինչպե՞ս կմեկնաբանի  Ադրբեջանի արտաքին գործերի նախարարի հայտարարությունը, ասաց. «Մի՞թե ձեզ համար ակնհայտ չէ, որ նրանց ասածները որևէ մեկնաբանության կարիք չունեն: Նրանք 20 տարի ասում են այն, ինչն իրենց ձեռնտու է. մի բան է խոսվում բանակցային սեղանի շուրջ, այլ բան՝ այլ տեղ, դրա համար մեկնաբանելու կարիք չկա: Ոչ թե պետք է մեկնաբանել, այլ սեփական  գիծն առաջ տանել»,- ասաց Շավարշ Քոչարյանը: