Հայաստանը չի օգտագործում ոչ մի այլընտրանք՝ դառնալով Ռուսաստանի գուբերնիա. Զարուհի Փոստանջյան

Այսօր ԱԺ արտահերթ նիստում քննարկվում է ՀՕՊ համաձայնագրի վավերացման հարցը:

Ելույթ ունեցավ «Ժառանգություն» խմբակցության ղեկավար Զարուհի Փոստանջյանը: Նա տարակուսեց, որ նման համաձայնագիր է բերվել ԱԺ ապրիլյան ռազմական գործողություններից հետո, երբ Ռուսաստանն իրեն չպահեց դաշնակից պետության նման:

Ինչ վերաբերում է ԱԺ ՀՀԿ խմբակցության պատգամավոր Խոսրով Հարությունյանի այն հայտարարությանը, որ Հայաստանը չպետք է խանդով վերաբերվի Ռուսաստան-Ադրբեջան ռազմավարական գործընկերությանը, Զարուհի Փոստանջյանը նշեց, որ Հայաստանը ոչ թե խանդում է, այլ արձանագրում փաստեր. այսօր աշխարհում միակ հարձակողական զենքն արտադրում է Ռուսաստանը, և այդ զենքը վաճառում է Ադրբեջանին, որն այն կիրառում է մեր դեմ՝ մահ սփռելով: Զարուհի Փոստանջյանի խոսքով` Հայաստանն անընդհատ այդ մտահոգության մասին բարձրաձայնում է, բայց միայն բարձրաձայնելը բավարար չէ, պետք է դրան հետևեն գործողություններ, ինչը չկա:

Ընդդիմադիր պատգամավորի համոզմամբ՝ Հայաստանը դարձել է Ռուսաստանի արբանյակը, և չի գործում Հայաստան-Ռուսաստան բարեկամության դաշինքը, չի գործում ՀԱՊԿ-ը: «Այդպես ամպագոռգոռ որ ասում եք` ուղղաթիռներն օդ կբարձրանան, ձեզ ո՞վ է թույլ տալու, որ ուղղաթիռ թռցնենք»,- ասաց պատգամավորը:

Ըստ նրա` Հայաստանը Ռուսաստանին է հանձնել քաղաքականությունը, ռազմական ոլորտը, տնտեսական՝ էներգետիկ, կապի ոլորտը և այլն, Հայաստանը չի օգտագործում ոչ մի այլընտրանք, մինչդեռ Իրանի հետ սերտ համագործակցությունը կարող է լինել հենց այդ այլընտրանքը: Հետևաբար` այս համաձայնագրերը Ռուսաստանին են անհրաժեշտ, այլ ոչ` Հայաստանին:

Զարուհի Փոստանջյանը տարակուսում է՝ Ռուսաստանը, Ղազախստան, Բելառուսը հայտարարում են, որ Հայաստանի թշնամի Ադրբեջանն իրենց բարեկամն է, ուրեմն որտեղ՞ է այս ամենի մեջ Հայաստանի տեղը: