ՀԲ ֆինանսավորմամբ` կմեկնարկի զբոսաշրջային ենթակառուցվածքների զարգացման ծրագիրը

Այսօր էկոնոմիկայի նախարարությունում հանրային քննարկման դրվեց «Բնապահպանական, սոցիալական և մշակութային ժառանգության ռազմավարական գնահատում» փաստաթուղթը: 2016թ. պետք է մեկնարկի տեղական տնտեսության և ենթակառուցվածքների զարգացման ծրագիրը, որը Համաշխարհային բանկի ֆինանսավորմամբ իրականացվող հինգերորդ ծրագիրն է և իրականացվելու է 5 տարվա ընթացքում: Ծրագրի ընդհանուր արժեքն է 68 միլիոն դոլար, որից Համաշխարհային բանկի վարկը 55 միլիոն դոլար է, իսկ Հայաստանը կտրամադրի 13 միլիոն դոլար` որպես համաֆինանսավորում:

Ծրագրի նպատակն է բարելավել ենթակառուցվածքային ծառայությունները և ինստիտուցիոնալ կարողությունները Հայաստանի` ընտրված 5 մարզերի` Լոռու, Վայոց ձորի, Կոտայքի, Արարատի, Սյունիքի տեղական տնտեսության մեջ զբոսաշրջային ոլորտի ներդրման ավելացման համար: Ծրագրի իրականացմամբ ակնկալվում է, որ այս մարզերում բնակիչներին ու զբոսաշրջիկներին հասանելի կլինեն որակյալ հանրային ենթակառուցվածքներ, կավելանա մասնավոր հատվածի ներդրումների ծավալը, իսկ վերականգնված մշակութային ժառանգության վայրերում և քաղաքներում` փոքր միկրոձեռնարկությունների քանակը:

Հայաստանի տարածքային զարգացման հիմնադրամի  սոցիալական մասնագետ Սոնյա Մսրյանը լրագրողների հետ զրույցում հայտնեց, որ ծրագրի հիմնական նպատակն է զարգացնել զբոսաշրջային ենթակառուցվածքները, օրինակ` Խոր Վիրապում, Դվինում, Արենիում, Գորիսում, Մեղրիում, Սանահին-Հաղպատում:

Ինչ վերաբերում է ենթակառուցվածքներին, Սոնյա Մսրյանի խոսքով` տարբեր զբոսաշրջային տեղերում խոսքը կարող է գնալ տարբեր ենթակառուցվածքների մասին, մի տեղ դրանք կարող են լինել ավտոկայանատեղիները, մեկ այլ տեղ` տմոսերի կրպակները, փոքր շուկայատեղիները և այլն: