Բունդեսթագի թուրք պատգամավորը պահանջում է արգելել Էրդողանի մուտքը Գերմանիա

Բունդեսթագում Ձախերի կուսակցության պատգամավոր Սևիմ Դաղդելենը գերմանական Bild պարբերականին տված հարցազրույցում պահանջել է արգելել Ցեղասպանության ճանաչմանը կողմ քվեարկած 11 խորհրդարանականների դեմ սպառնալիքներ հնչեցրած անձանց, այդ թվում՝ Էրդողանի մուտքը Գերմանիա:

Ըստ Birgun-ի՝ Դաղդելենը հայտնել է, որ սոցցանցերում իր դեմ արշավ է սկսվել՝ անգամ իր հասցեին մահվան սպառնալիքներ և վիրավորանքներ են հնչում: Օգտատերերից մեկը նրան «հայ պոռնիկ» է անվանել, իսկ մյուսը՝ 100 հազար եվրո պարգևավճար խոստացել նրան սպանողին:

Գերմանիայի միգրացիայի և ինտեգրման հարցերով թուրք նախարար Այդան Օզողուզը Bild am Sonntag  թերթին տված հարցազրույցում Գերմանիայում գործող թուրքական կազմակերպություններին խորհուրդ է տվել ողջամտության կոչով հանդես գալ: Նա նշել է, որ թեև Գերմանիայում ապրող թուրք պատգամավորները չեն մոռացել իրենց ծագումն ու արմատները, այնուամենայնիվ, չեն պատրաստվում Թուրքիայի համար դառնալ խամաճիկ: