Էրդողանի թիկնապահներն արգելել են լրագրողների մուտքը նրա դասախոսությանը

Միջուկային անվտանգության գագաթաժողովին մասնակցելու համար ԱՄՆ մեկնած` Թուրքիայի նախագահ Ռեջեփ Թայիփ Էրդողանը դասախոսություն է կարդացել Վաշինգտոնի Բրուքինգյան ինստիտուտում, սակայն նրա թիկնապահները թույլ չեն տվել լրագրողներին մտնել դասախոսության լսարան:

Ըստ The Financial Times-ի՝ մինչև Էրդողանի դասախոսությունը՝ թղթակիցներից մեկը եղել է լսարանում, սակայն նախագահի թիկնազորը փորձել նրան դուրս հանել դահլիճից: Ինստիտուտի աշխատակիցների միջամտությունից հետո միայն լրագրողին թույլ են տվել մնալ դահլիճում։

Դասախոսությամբ հանդես եկած Էրդողանը քննադատել է ԱՄՆ-ի՝ Սիրիայի քրդերին աջակցությունը։ Նա անդրադարձել է  նաև սեփական երկրում ԶԼՄ-ների քննադատություններին՝ նշելով, թե «ինքն ընդունում է քննադատությունը, սակայն պայքարում է վիրավորանքների ու զրպարտության դեմ»:

Հիշեցնենք, որ նույն թիկնապահները կենդանիների ձայներ էին հանել` փորձելով ոչ լսելի դարձնել Էրդողանի դեմ բողոքի ակցիայի մասնակիցների ձայնը: