Վերջին զանգը, ցավոք, դառնում է նույն գործընթացը, ինչ Ամանորի սեղանների մրցակցությունը. Լևոն Մկրտչյան

Տեղեկացրել էինք, որ այսօր ՀՀ ԿԳ նախարար Լևոն Մկրտչյանը մասնակցեց Արմավիրի մարզի Գետաշեն համայնքի դպրոցի շրջանավարտների Վերջին զանգի արարողությանը:

Լրագրողների հետ զրույցում նախարարն անդրադարձավ այս օրերին դպրոցներում տեղի ունեցող հնարավոր դրամահավաքին` ևս մեկ անգամ հորդորելով զերծ մնալ ամեն տեսակ դրամահավաքներից:

«Կրկին կոչ ենք անում ավելի համեստ ու բովանդակալից նշել Վերջին զանգը: Մենք մեր հերթին զգուշացրել ենք տնօրեններին, որպեսզի բացառեն դրամահավաքը: Ծնողական կոմիտեներին զգուշացրել ենք հավաքել այն մինիմալ գումարը, որն անհրաժեշտ է երեխաների համար: Վերջին զանգի արարողությունը, ցավոք, դառնում է նույն գործընթացը, ինչ մեր` Ամանորի սեղանների մրցակցությունը»,- ասաց նախարարը:

Ինչ վերաբերում է «Թրասնփարենսի ինթերնեյշնլ»-ի հրապարակած տվյալներին, որ ինչ-ինչ դպրոցներում, այնուամենայնիվ, դրամահավաք կա, Մկրտչյանը նշեց, որ իրենք, խնդրի հետ կապված, արդեն հատուկ հանձնաժողով են ստեղծել, և հարցը քննարկվել է: «Այդ դպրոցներից  մեկի երեխաները` 300-400 հոգի, եկել էին նախարարություն` ասելով, որ տնօրինությունը կապ չունի դրամահավաքի հետ»,- ասաց նա:

Հարցին` բացառո՞ւմ եք, որ այդ բողոքը կարող է ուղղորդված լինել հենց ուսուցչական կոլեկտիվների կողմից,` նախարարը պատասխանեց, որ չի բացառում, քանի որ այդ ժամանակ Թեժ գծին առաջին անգամ սկսեցին հայտնվել զանգեր, և մարդիկ ասում էին` «թողեք` երեխաները հանգիստ Վերջին զանգ նշեն, ինչո՞ւ եք խանգարում ու հարամում»:

«Ես մի համոզմունք ունեմ, որ, պատժելով, մտրակ վերցնելով ու հետո` զեկուցելով, թե` սա ենք արել, հարցը չի լուծվում: Մենք պետք է վերանայենք դպրոցների խորհուրդների աշխատանքը: Դրանք, ըստ էության, հավաքվում են կա'մ տնօրեն ընտրելու, կա'մ էլ ձևական բյուջե հաստատելու համար: Խորհուրդը պետք է անընդհատ պատասխանատու լինի դպրոցի որակի համար: Շատ բան կենտրոնացնել նախարարության ձեռքում` նույնպես ճիշտ չէ, մենք պետք է նաև վստահենք ուսումնական հաստատություններին: Համալսարանական, դպրոցական ինքնավարությունը բարձրացնելու ճանապարհով է հնարավոր մի շարք խնդիրներ լուծել»,- ասաց Մկրտչյանը: