Մի՛ մտեք իմ ու Սասուն Միքայելյանի հարաբերությունների մեջ. Գագիկ Ջհանգիրյան

Այսօր լրագրողները ՀԱԿ խմբակցության պատգամավոր Գագիկ Ջհանգիրյանից հետաքրքրվեցին, թե ինչ կարծիք ունի Նիկոլ Փաշինյանի՝ ՀԱԿ խմբակցությանն ուղղված նամակի մասին:

Նշենք, որ Նիկոլ Փաշինյանը, ով Հրազդանի քաղաքապետի թեկնածու Սասուն Միքայելյանի նախընտրական շտաբի ղեկավարն է, նամակով դիմել էր ՀԱԿ խմբակցությանը` խնդրելով Հրազդանի քաղաքապետի ընտրություններում ՀԱԿ վստահված անձանց տեղերը տրամադրել «Քաղաքացիական պայմանագիր» կուսակցությանը:

Գագիկ Ջհանգիրյանը նախ ասաց, որ տեղյակ չէ` ինչի մասին է խոսքը:

Լրագրողների դիտարկմանը, թե Նիկոլ Փաշինյանը նամակ է ուղարկել ՀԱԿ խմբակցությանը, արձագանքեց կատակով. «Նամակ է ուղարկե՞լ: Իսկ ինձ հեռագիր չի ուղարկե՞լ»:

Հարցին, թե ի՞նչ հարաբերություններ ունի Սասուն Միքայելյանի հետ, Գագիկ Ջհանգիրյանը պատասխանեց. «Մի՛ մտեք իմ ու Սասուն Միքայելյանի հարաբերությունների մեջ»: