ՀՀԿ-ն չգիտի` կոալիցիա կլինի, թե ոչ

Այսօր ՀՀԿ ԳՄ նիստում քննարկվել են ներքաղաքական, ներկուսակացական հարցեր, Սահմանադրական բարեփոխումներից բխող նոր ԸՕ-ի առնչությամբ  ՀՀԿ տեսակետները, արտաքին կարեւորագույն հարցեր: ՀՀԿ ԳՄ նիստից հետո հայտարարեց ՀՀԿ մամուլի խոսնակ, ՀՀ ԱԺ փոխնախագահ Էդուարդ Շարմազանովը:

Լրագրողները Շարմազանովից հարցրին` արդյոք նիստում քննարկել են կոալիցիա ձեւավորելու  եւ նոր նշանակումների հարց:

«Մամուլը բաշխում է, ազատում է նշանակում է, մեկին բերում է, մյուսին  տանում է: Դա մամուլի խնդիրն է: Չեմ պատրաստվում մեկնաբանել մամուլի այդ հրապարակումները, դրանք բազմաժանր են, բազմատեսակ: Դռները չենք փակում, համագործակցության կողմնակից ենք, սակայն համագործակցությունը պետք է լինի ծրագրային, գաղափարական: ՀՅԴ մեր գործընկերների հետ քննարկվում է համագործակցության ձեւաչափը: Այս պահին որեւէ բան հստակեցված չէ:Միգուցե հաջորդ նիստի ընթացքում կամ դրանից հետո նոր զարգացումների մասին կխոսեմ, այս պահին վերջնական որևէ բան հստակեցված չէ, կապրենք կտեսնենք»,- հայտարարեց Շարմազանովը:

 Նա նշեց, որ ԳՄ նիստում պաշտոնների բաշխում, կոալիցիայի մասին քննարկում տեղի չի ունեցել: «ՀՀԿ Գործադիր մարմինը վերջնականապես չի քննարկել` ում հետ պետք է գնանք համագործակցության, ինչ ձեւաչափով, կլինի կոալիցիա, թե չի լինի»,- ասաց ՀՀԿ մամուլի խոսնակը: