Օպերայի թատրոնում կրքերը հանդարտվեցի՞ն

Իտալացի հայտնի դիրիժոր Ջանլուկա Մարչիանոն Հայաստանում է` գործով. Ալ. Սպենդիարյանի անվան օպերայի և բալետի ազգային ակադեմիական թատրոնում հրավիրյալ դիրիժոր է` դեռ 2014-ի սեպտեմբեր ամսից:

Հիշեցնենք, որ 2015-ի դեկտեմբերին թատրոնի գեղարվեստական ղեկավար Գեղամ Գրիգորյանի առաջարկով լուծարվել էր գլխավոր դիրիժորի հաստիքը: Պաշտոնական պարզաբանումն այսպիսին էր` դիրիժորի հաստիքը կրճատվել է, քանի որ թատրոնն ունի գեղարվեստական ղեկավար:

Այժմ արդեն նախկին գլխավոր դիրիժոր Կարեն Դուրգարյանն էլ նշել էր, որ աթոռի համար կռիվ չի տալու, իր համար կարևորը հաստիքի վերականգնում է, իսկ թե ո՞վ կլինի այդ հաստիքում, երկրորդական է:

Այս օրերին թատրոնում  կրքերը համեմատաբար հանդարտվել են: Ինչպես լինում է միշտ` սկզբում աղմկում ենք, հետո` հարմարվում: Թե ինչպե՞ս է թատրոնը գոյատևելու առանց գլխավոր դիրիժորի, պարզ չէ, քանի որ դեռ պարզ չէ նաև Գեղամ Գրիգորյանի առաջարկած նոր` թատրոնի զարգացման ծրագիրը:

Օպերայի թատրոնից, սակայն, խոստանում են առաջիկայում /հավանաբար, հենց հունվարի 20-ին, քանի որ 1933-ի այս օրն առաջին ներկայացումը` Ալեքսանդր Սպենդիարյանի «Ալմաստ» օպերան բեմադրվեց/ մամլո ասուլիսով հանդես գալ: