Սահմանադրական բարեփոխումների լավն ու վատը կերևան հետագա կյանքում. Գագիկ Խաչատրյան

Արդեն տեղեկացրել ենք, որ այսօր խորհրդարանում ֆինանսների նախարար Գագիկ Խաչատրյանը լրագրողների հետ զրույցում ասել էր, որ  կյանքը 2016 թվականին դժվարանալու է: Պատասխանելով հարցին, թե սահմանադրական փոփոխությունները հեշտացնելո՞ւ են կյանքը, նա ասաց. «Մենք պետք է աշխատենք, օրենք ընդունելուց հետո պետք չէ սպասել, որ կյանքը, առանց մնացած գործողությունները կատարելու, լավանա: Հիմա ասում ենք՝ օրենքը փոխենք: Օրենքը փոխում ենք, դրանից հետո էլ կան քայլեր, որ պետք է անենք, որ լավանա: Մենք շատ լավ գործ արեցինք՝ արտոնություն տվեցինք հիփոթեքի գծով, որպեսզի երիտասարդ ընտանիքները կարողանան օգտվել: Բայց որպեսզի ինքը զարգանա, դրան պետք է հետևեն ծրագրերը, այսինքն՝ միայն օրենքն ընդունելը բավարար չէ»:

Հարցին՝ գործող Սահմանադրությունը խանգարո՞ւմ է, որ մարդիկ ավելի լավ ապրեն, նախարարը պատասխանեց. «Հիմա կառավարման այլ մոդել է ընտրվում, որն ավելի դեմոկրատական է: Տարբեր հարթությունների մեջ կարելի է քննարկել: Լավն ու վատը կերևան հետագա կյանքում»:

Հարցին՝ բայց մեր իշխանություններն ուզո՞ւմ են լավ լինի, Գագիկ Խաչատրյանը պատասխանեց. «Ինչի՞ չեն ուզում, մեր իշխանությունները կարո՞ղ է, ասենք, Ադրբեջանի իշխանություններն են: Կլինի նոր Սահմանադրությունը, հանրաքվեն ցույց կտա, թե ինչ մոդել ենք ընտրում»: Նրա խոսքով`կյանքը կլավանա այն ժամանակ, եթե առավոտյան ամեն մեկն արթնանա և գնա իր գործերով: