Գագիկ Ծառուկյանը պատգամավորական աշխատավարձ չի ստանում բացակայությունների պատճառով

ԱԺ աշխատակազմի ղեկավար Հրայր Թովմասյանն այսօր լրագրողներին հայտնեց, որ ԱԺ-ին բյուջեով հատկացված գումարների մեծ մասը կազմում են աշխատավարձերը: Նա հիմնավորված համարեց ԱԺ-ի իրականացրած բոլոր ծախսերը:

Անդրադառնալով գործուղումներին՝ Թովմասյանը նշեց, որ իրենք հնարավորինս սեղմ կազմով են մեկնում, և ինքնաթիռում միայն ԱԺ նախագահն է օգտվում առաջին կարգի տեղից, մնացածները զբաղեցնում են էկոնոմ տեղերը:

Ինչ վերաբերում է արտերկրում հյուրանոցային ծախսերին, Հրայր Թովմասյանի խոսքով, ԱԺ նախագահը վերջին գործուղման ժամանակ մնացել է չորս աստղանի հյուրանոցում:

Լրագրողները հարցրեցին նաև ծառայողական մեքենաների վերանորոգման ծախսերի մասին՝ կարծիք հայտնելով, որ դրանք շատ ուռճացված են: Հրայր Թովմասյանը պատասխանեց, որ հաճելի չէ, երբ ինչ-որ հյուրի են դիմավորում, և մեքենան ճանապարհին խափանվում է: «Եղել են դեպքեր, երբ ԱԺ նախագահին ուղեկցողի մեքենան է խափանվել»,- ասաց նա:

Լրագրողները հարցրեցին՝ արդյո՞ք բացակայող պատգամավորները շարունակում են  աշխատավարձ ստանալ: ԱԺ աշխատակազմի ղեկավարը պատասխանեց, որ բացակայող պատգամավորների աշխատավարձերից պահումներ են կատարվում, մասնավորապես՝ ամեն բացակայությունից գանձվում է 30.000 դրամ:

Հարցին` Գագիկ Ծառուկյանը որքա՞ն աշխատավարձ է ստանում, պատասխանեց՝ նա աշխատավարձ չի ստանում, որովհետև բացակայությունների համար նրանից էլ են պահումներ արվում: