ԵՏՄ օրենքով նախատեսվում են պատիժներ պետական պաշտոնյաների համար. Արտակ Շաբոյան

Հայաստանի`ԵՏՄ-ին անդամակցությունից հետո մի շարք նոր տնտեսվարողներ սկսել են Ռուսաստանից պատրաստի ալյուր և հավի միս ներմուծել, ինչը թեև բացասաբար է ազդում տեղական արտադրողների վրա, բայց, անյուամենայնիվ, դրական ազդեցություն է ունենում` մրցակցության առումով: Այս մասին այսօր խորհրդարանում լրագրողներին ասաց Տնտեսական մրցակցության պետական հանձնաժողովի նախագահ Արտակ Շաբոյանը:

Պատասխանելով հարցին, թե արվե՞լ է համապատասխան  ուսումնասիրություն Եվրամիության երկրներից Հայաստան ներկրումների ծավալների վերաբերյալ, նա ասաց, որ նման  ուսումնասիրություն չի արվել:  

Շաբոյանը նշեց նաև, որ ԵՏՄ մրցակցության կանոններով՝  խիստ պատիժներ են սահմանվելու հակամրցակցային գործունեության համար:  «Սա վերաբերում է հակամրցակցային անդրսահմանային  գործողություններին` եթե հայկական ընկերությունը չարաշահում է իրականացնում ՌԴ տարածքում կամ հակառակը: Մեր ազգային օրենսդրությունը թողնում ենք այնպես, ինչպես կա: ԵՏՄ օրենքով նախատեսվում է տուգանքների խստացում ԵՏՄ անդամ երկներում: Նաև սահմանվում են պատիժներ պետական պաշտոնյաների համար, ովքեր կատարում են հակամրցակցային գործունեություն»,- ասաց նա` հավելելով. «ԵՏՄ մրցակցության կանոններով կարող են տուգանվել հասույթի մինչև 10 տոկոսի չափով,  մեզ մոտ՝ մինչև հասույթի 2 տոկոսի չափով»: