Ռուբլուն անցնելը մեզ ձեռնտու է. ՀՀԿ-ական պատգամավոր

Այսօր Պուտին-Սարգսյան վերջին հանդիպման մասին լրագրողների հետ խոսեց ԱԺ ՀՀԿ խմբակցության պատգամավոր Մանվել Բադեյանը:

Նախ` անդրադարձ կատարվեց արժույթի փոփոխության հեռանկարներին: Հիշեցնենք, որ Պուտինն էր ակնարկել ԵՏՄ տարածքում միասնական արժույթ ունենալու և դոլարից հրաժարվելու մասին: Իսկ երեկ Բելառուսում ՀՀ վարչապետ Հովիկ Աբրահամյանն առաջարկել էր ԵՏՄ անդամ երկրների կառավարության ղեկավարներին` ռազմավարական կարևորության արտադրանքների վաճառքը կազմակերպել ռուբլիով և ոչ դոլարով:

ՀՀԿ-ական պատգամավոր Մանվել Բադեյանի կարծիքով` միասնական արժույթով գործարքներ իրականացնելը մեծ վերլուծություն պահանջող խնդիր է, որովհետև տեխնիկապես բարդ խնդիր է`անցնել հաշվարկային այլ միավորի, և միայն քաղաքական կամքը բավարար չէ:

«Առաջարկը ճիշտ առաջարկ է, որովհետև միջնորդավորված  վալյուտայով աշխատելը նշանակում է ռիսկի տակ դնել ազգային վալյուտան: Ես չեմ տեսնում այն ռեսուրսները, որ Ռուսաստանը կարող է իր արժույթն ուժեղացնել` համեմատած դոլարի կամ եվրոյի հետ: Այդ պարագայում ձեռնտու են դառնում Հայաստան ներմուծումները: Եվ քանի որ մենք ռուսական գազի ու նավթամթերքի ներմուծողն ենք, ուստի կարևոր է հաշվարկային միջոց սարքել ռուբլին, մեզ ձեռնտու կլինի»,- ասաց պատգամավորը:

Նա նաև հավելեց, որ, մյուս կողմից, դա հակառակ ազդեցություն կունենա արտահանման վրա: