Թուրք ոստիկանն արտաքնոցում պոկել է հայ բժշկի զինվորական համազգեստի նշանները՝ որպես նվաստացում

Ծնվել է մոտ 1880 թ.:

1900 թ. ավարտել է Կոստանդնուպոլսի Կալաթասերայի «Մեքթեբ-ի Սուլթանիե» բարձրագույն վարժարանը:

1904 թ. ավարտել է Կ. Պոլսի Օսմանյան դեղագործարան վարժարանը և դեղագործ աշխատել:

Կ. Պոլսի Օսմանբեյ թաղամասում (Շիշլիի մոտ) ունեցել է սեփական դեղատուն և պատրաստել «Fitinli Maksut Surubu», «Terpestezin Ampulleri» դեղերը:

1914 թ. Առաջին համաշխարհային պատերազմի ժամանակ զորակոչվել է օսմանյան բանակ և զինվորական դեղագործ ծառայել:

1915 թ. ապրիլի 11-13 (24-26)-ի ընթացքում, լինելով զինվորական ծառայության մեջ, բանտարկվել է Կ. Պոլսի կենտրոնական բանտում:

Թուրք ոստիկանը նրան Կ. Պոլսի Հայտար փաշայի Ա. սպասասրահից արտաքնոց տանելով որպես նվաստացում պոկել է նրա զինվորական համազգեստի նշանները: Այնուհետև, աքսորվել է Չանղըրը:

Անունը փորագրվել է Չանղըրըի բանտում հավաքված համրիչի 99 հատիկներից մեկի վրա:

Եղել է Չանղըրըից ազատված 5 հոգանոց առաջին խմբի կազմում:

Մեծ Եղեռնից հետո վերապրել է:

1949-51 թթ. եղել է սբ. Փրկիչ ազգային հիվանդանոցի հոգաբարձուների խորհրդի անդամ:

Մինասյան Հ., Օսմանյան կայսրությունում, Թուրքիայի Հանրապետությունում և հարակից տարածքներում բռնաճնշումների և ցեղասպանության ենթարկված հայ բժիշկներ: Համառոտ կենսագրական բառարան, Երևան, 2014, 519 էջ, էջ 252–253: