Արդարադատության նախարարը դժվարացավ մեկնաբանել Սուրիկ Խաչատրյանի որդու մասնակցությամբ միջադեպը

Այսօր լրագրողները արդարադատության նախարար Հովհաննես Մանուկյանին հարցրեցին Սյունիքի մարզպետ Սուրիկ Խաչատրյանի որդու մասնակցությամբ ծեծկռտուքի մասին, որի արդյունքում տուժել են երկու եղբայրներ:

Լրագրողները հարցրեցին, թե ինչպե՞ս է ստացվում, որ մինչև որոշում է կայացվում` մարզպետի որդուն բերման ենթարկել, նա արդեն փախուստի դիմած է լինում: Նախարարը պատասխանեց. «Արդարադատության համակարգն այստեղ խնդիր չունի: Այստեղ քրեական հետապնդման մարմինների մասին է խոսքը, և պետք է դիմեք նրանց»: Նա միայն ասաց, որ որքան լավ աշխատեն քրեական հետապնդման մարմինները, այնքան լավ կլինի:

Արդարադատության նախարարն այդպես էլ որևէ գնահատական չհնչեցրեց` ասելով, որ այդ թեմայով բոլոր հարցրերն ուղղված են այլ իրավասու մարմիններին:

«Ես` ինքս, ո'չ քննություն եմ վարում, ո'չ որոշումներ եմ կայացնում այդ գործով, ուրեմն ինձ համար շատ դժվար է, որևէ մեկնաբանություն կատարել: Կոնկրետ գործը չեմ ուզում մեկնաբանել, բայց անպատժելիությունը, այո, վատ բան է»,- ասաց Մանուկյանը: