Նախագահը դիվանագիտական բառախաղի է դիմել. ՀՀԿ-ականը բացատրեց, թե ինչու հողային պահանջ չունենք

ՀՀԿ խմբակցության պատգամավոր Վազգեն Կարախանյանը Yerkir.am–ի հետ զրույցում նշեց` քանի որ Թուրքիան չի ճանաչում Հայոց ցեղասպանությունը, ճիշտ չէ խոսել հողային պահանջների մասին:

«Ցեղասպանությունը չճանաչած երկրից ի՞նչ կարող ես պահանջել: Շատ հնարավոր է, որ սա նաև քաղաքական բառախաղ է»,- ասաց Կարախանյանը:

Նա նաև համոզմունք հայտնեց, որ Սերժ Սարգսյանի այն ասածը, թե մենք Թուրքիայից հողային պահանջներ չունենք, չի կարող Թուրքիայի ձեռքին մեր դեմ գործիք դառնալ:

«Եթե ուշադիր լսենք նախագահի ասածները, կհասկանանք, որ այստեղ առկա է դիվանագիտական բառախաղ: Այդպիսի բառախաղեր օգտագործում են երկրների լիդերները: Եթե չկա Ցեղասպանության ընդունում հասցեատիրոջ կողմից, ուստի երկրորդ, երրորդ կետերը ինքնաբերաբեր դուրս են գալիս օրակարգից: Մենք ոչ միայն հողային, այլև մշակութային, հոգևոր պահանջներ ունենք: Պարզապես այս ամենի համար ժամանակ է հարկավոր»,- եզրափակեց պատգամավորը: