Հայ մասնակիցներն «Անտրե»-ից վերադարձել են միջազգային փառատոների մասնակցության հրավերներով

Մարտի 27-29-ը ՌԴ Վորոնեժ քաղաքում կայացել է ԱՊՀ մասնակից-երկրների պարարվեստի քոլեջների «Անտրե» փառատոնը: Փառատոնին մասնակցել է 7 երկրի պատվիրակություն` Ռուսաստանից, Հայաստանից, Բելառուսից, Մոլդովայից, Ղրղզստանից, Ուզբեկստանից, Տաջիկստանից:

Փառատոնին մասնակցած` Երևանի պարարվեստի պետական քոլեջի հինգ սաները` Սաթենիկ Ղազարյանը, Ռուզաննա Կլեչյանը, Դավիթ Կղբելյանը, Անահիտ Աֆաջանյանը և Համլետ Միրզոյանը, փայլուն ելույթներով հանդես են եկել և արժանացել հեղինակավոր ժյուրիի բարձր գնահատականին: Հատկապես բարձր է գնահատվել քոլեջի պարուսույցների աշխատանքը: Փառատոնի ծրագրում ընդգրկված էին վարպետության դասեր, որոնք վարել են Մոսկվայի պարարվեստի ակադեմիայի պարուսույցները:

Ծրագրի շրջանակում Վորոնեժի օպերայի և բալետի թատրոնում անցկացվել է նաև համերգ: Հայ պատվիրակներն անվանական հրավերներ են ստացել` տարբեր երկրներում անցկացվող հեղինակավոր մրցույթներին և փառատոներին մասնակցելու համար: