Նոբելյան դափնեկիր թուրք գրողը չի ցանկանում մեկնաբանել Հայոց ցեղասպանությունը

Today's Zaman թուրքական օրաթերթի համաձայն՝ թուրք գրող, Նոբելյան մրցանակի դափնեկիր Օրհան Փամուքն ասել է, որ թեեւ Թուրքիայի ռազմական ուժերը հետին պլան են մղվել, դրանց զգալի չափով փոխարինել է իսլամական և ավտորիտար կառավարությունը:

«Ավտորիտար զինվորներին դուրս են մղել, իսկ նրանց տեղը գրավել է ավտորիտար և իսլամական կառավարությունը»,– France-Presse գործակալությանը Ստամբուլում տված հարցազրույցում ասել է գրողը` վկայակոչելով Թուրքիայի նորագույն պատմությունը, որի քաղաքական կյանքից հետզհետե անհետանում է ռազմական ազդեցությունը, իսկ իշխանությունը կենտրոնանում է նախագահ Ռեջեփ Թայիփ Էրդողանի և իշխող «Արդարություն և զարգացում» կուսակցության ձեռքում:

Ըստ գրողի՝ իշխող կուսակցությունը ոչնչացնում է ուժերի հավասարակշռությունը, որը ժողովրդավարության բանալին է: «Այս առումով`Թուրքիայում առկա է միայն ընտրական ժողովրդավարությունը, իսկ մարդու իրավունքները և ազատ խոսքը ոտնահարվում են ամեն օր: Ես վերադարձա և զգացի վախի մթնոլորտը, մարդիկ շշուկով էին խոսում»,- ասել է գրողը, ով դասավանդում է Նյու Յորքի Կոլումբիայի համալսարանում:

2005 թվականին նրա հնչեցրած դիտողություններից հետո, որին հաջորդեցին սպառնալիքները նրա հասցեին, Փամուքն այլևս չի մեկնաբանում Հայոց ցեղասպանության հարցը: «8-10 տարի առաջ ես շատ դժվարություններ եմ ունեցել այս թեմայի շուրջ խոսելու պատճառով»,- ասել է գրողը:

Աղբյուրը՝ armeniangenocide100