«Բանդայի» գործով մեղադրական ճառը չհրապարակվեց

Այսօր Կենտրոն և Նորք-Մարաշ վարչական շրջանների ընդհանուր իրավասության դատարանում մի շարք պաշտոնատար անձանց և մեծահարուստների տներ թալանած «բանդայի» գործով մեղադրող դատախազը պետք է հանդես գար մեղադրական ճառով: Սակայն դատավոր Մեսրոպ Մակյանը հայտնեց, որ դատախազը վատառողջ է և առաջիկա երկու շաբաթվա ընթացքում չի կարողանա մասնակցել դատական նիստի: Այդ իսկ պատճառով այսօրվա դատական նիստը հետաձգվեց, հաջորդը նշանակվեց դեկտեմբերի 3-ին:

Ի դեպ,  դատարանը, առավոտյան տեղեկանալով դատախազի` նիստին ներկայանալ չկարողանալու մասին, քայլեր էր ձեռնարկել գործով ամբաստանյալներին անտեղի դատարան չբերելու ուղղությամբ:

Yerkir.am-ի հետ զրույցում «բանդայի» ենթադրյալ պարագլուխ, գործով ամբաստանյալ Արտուշ Հակոբյանի կինը` տիկին Մարինան, հույս հայտնեց, որ դատարանը չի կատարի վերևից եկած պատվերը, եւ իր ամուսինն ու գործով մյուս ամբաստանյալները կարդարացվեն: Նա հերթական անգամ շեշտեց, որ ամբաստանյալները որևէ առնչություն չունեն կատարված ավազակային հարձակումների հետ:

Նշենք, որ երկու տարուց ավելի է, ինչ հիշյալ գործը քննվում է դատարանում:

Եղիշե Դավթյան