Ալեքսեյ Լյուբիմովը մենահամերգով հանդես կգա Երևանում

Հոկտեմբերի 8-ին «Արամ Խաչատրյան» համերգասրահում «Երևանյան հեռանկարներ» 15-րդ միջազգային երաժշտական փառատոնի շրջանակներում մենահամերգով հանդես կգա աշխարհահռչակ ռուս դաշնակահար Ալեքսեյ Լյուբիմովը: Դաշնակահարի կատարմամբ կհնչեն Մոցարտի, Շուբերտի, Կոմիտասի և Դեբյուսիի ստեղծագործությունները:

Այս տարի «Երևանյան հեռանկարները» սկիզբ են առել մեծանուն կոմպոզիտոր Քշիշտոֆ Պենդերեցկու 80-ամյա հոբելյանին նվիրված հինգ համերգներով, այնուհետև ներկայացրել Ելենա Բաշկիրովայի մենահամերգը, իսկ մայիսի 13-ին տեղի ունեցավ Բեռլինի պետական նվագախմբի (Staatskapelle Berlin) հիշարժան համերգը` Դանիել Բարենբոյմի ղեկավարությամբ:

Իր հոբելյանական` 15-րդ տարում «Երևանյան հեռանկարները» ընդգրկվեց Բրյուսելում կայացած` կրթության, մշակույթի, բազմալեզվության և երիտասարդության հարցերով եվրակոմիսար Անդրուլա Վասիլիուի հետ կայացած կլոր սեղանի մասնակիցների շարքում և համարվեց Եվրոպայի առաջատար մեկ տասնյակ փառատոներից մեկը: