«Արմենիա» ավիաընկերության հիմնադիրը հերքում է Հովիկ Աբրահամյանի կապը ընկերության հետ

Վրացական BusinessPressNews (BPN) լրատվական գործակալությունը, վկայակոչելով սեփական աղբյուրները, տեղեկություն է հրապարակել, թե նորաստեղծ «Արմենիա» ավիաընկերության բաժնետոմսերի 50 տոկոսի սեփականատերը ՀՀ վարչապետ Հովիկ Աբրահամյանն է:

«Արմենիա» ավիաընկերության հիմնադիր Թամազ Գաիաշվիլին yerkir.am-ի հետ զրույցում կտրականպես հերքեց վրացական ԶԼՄ-ի կողմից հրապարակված տեղեկությունը, ավելին` դա չար լեզուների արածին վերագրեց:

«Նման հայտարարություններ տարածում են այն մարդիկ, ովքեր ցանկանում են ճանապարհից հեռացնել մրցակիցներին և հասնել նրան, որպեսզի Հայաստանի կառավարությունը չաջակցի նոր բացվող ավիաընկերությանը, որ թշնամական հարաբերություններ ստեղծվեն: Հայաստանի վարչապետը, որևէ կապ չունի այս ավիաընկերության հետ և որևէ մասնաբաժին նույնպես չունի: Վարչապետն ուղղակի նույնպես անհանգստացած է, որ Հայաստանում այս պահին չկա նորմալ գործող ավիաընկերություն, որը կներկայացներ Հայաստանը: Վարչապետն ամեն կերպ հետաքրքրված է և բոլորին կօգնի, որպեսզի հայկական ավիացիան ոտքի կանգնի: Սա ուղղակի չար լեզուներն են»,- հայտարարեց Թամազ Գաիաշվիլին:

Ի դեպ, մեր տեղեկություններով, առաջիկայում նա նաեւ Երեւանում մամուլի ասուլիսով հանդես կգա եւ կպատասխանի լրագրողների հարցերին: