Հունաստանը պատրաստվում է Ցեղասպանության ժխտումը քրեականացնող օրինագիծ ընդունել

Երեկ՝ սեպտեմբերի 2-ին, Հունաստանում ռասիզմի դեմ պայքարի օրինագիծը քննարկման է հանձնվել խորհրդարանում:

Ըստ Haberler-ի՝ Հունաստանի արդարադատության նախարարության կողմից նախաձեռնված` «Պայքար ռասիզմի դեմ» օրինագիծը բաղկացած է 6 կետից՝ միջազգային դատարանների և Հունաստանի խորհրդարանի կողմից ճանաչված ցեղասպանությունները, պատերազմական հանցագործությունները, մարդկության դեմ արված հանցագործությունները, ինչպես նաև նացիստական հանցագործություններն արդարացնող և բռնությունների կապակցությամբ նվաստացուցիչ պատճառաբանություններ ներկայացնող ու դրանք հերքող անձանց ենթարկել ֆինանսական տույժի և ազատազրկման:

Մինչ այդ այս օրինագիծը հանձնվել էր խորհրդարան, սակայն կոալիցիոն կառավարության գործընկերների միջև անհամաձայնությունների պատճառով դրա քննարկումը հետաձգվել էր: Այդ կապակցությամբ  կոալիցիոն կառավարության ամենամեծ գործընկերներից մեկը համարվող «Նոր դեմոկրատիա»-ից մի խումբ պատգամավորներ վարչապետ Անդոնիս Սամարասին նամակ էին հղել՝ «Փոքր Ասիայի, Պոնտոսի, ասորիների և հայերի ցեղասպանությունները» այդ օրինագծին հավելելու պահանջով` հայտնելով, որ այդ պահանջի չիրագործման դեպքում իրենք չեն քվեարկելու այդ օրինագծի օգտին:

Սույն օրինագիծ ուրբաթ օրվա քննարկումներ ընթացքում 51 կողմ ձայն հավաքելու դեպքում կհամարվի ընդունված:

Նշենք, որ Հունաստանի խորհրդարանը 1994 թվականին ճանաչել էր Պոնտոսի հույների, 1996-ին՝ հայերի, իսկ 1998 թվականին՝ Փոքր Ասիայում հույների ցեղասպանությունները:

Հարկ ենք համարում նշել, որ թուրքական կայքն այս ցեղասպանություններին անդրադառնալիս ցեղասպանություն բառը վերցրել է չակերտների մեջ: