Ավտոմեքենան ընկել է ձորն ու այրվել. կա մեկ զոհ

Ոստիկանությունից տեղեկանում ենք, որ այսօր գիշերը`ժամը 04.45-ին, ոստիկանության Չարենցավանի բաժնում ահազանգ է ստացվել այն մասին, որ Սևան-Երևան ճանապարհի 35-րդ կմ-ին ավտոմեքենա է վթարվել և այրվում է:

Մեկնած օպերատիվ խումբը պարզել է, որ հուլիսի 30-ին, ժամը 04.00-ի սահմաններում, 1986 թ. ծնված Սևակ Պ.-ի վարած «Հյունդաի Էլանտրա» մակնիշի ավտոմեքենան Սևան-Երևան ճանապարհին դուրս է եկել երթևեկելի գոտուց, մտել հանդիպակաց ուղեմաս, կոտրել երկաթյա արգելապատնեշն ու ընկել ճանապարհի աջ կողմում գտնվող ձորը:

Պատահարի հետևանքով ավտոմեքենան հրդեհվել է: Ուղևորուհիներից մեկը` 1984 թ. ծնված Ռոզա Արծրունին, տեղում մահացել է, իսկ վարորդն ու մյուս ուղևորուհի Շողիկ Հ.-ն և ուղևոր Բարսեղ Գ.-ն մարմնական վնասվածքներով տեղափոխվել են Երևանի «Սուրբ Գրիգոր Լուսավորիչ» բժշկական կենտրոն:

Ոստիկանության Չարենցավանի քննչական բաժանմունքում հարուցվել է քրեական գործ ՀՀ քր. օր.-ի 242 հոդվածի 2-րդ մասի հատկանիշներով: