Ոչ ոք բարոյական իրավունք չունի նման բան ասելու. ազատամարտիկը` Ուորլիքի հայտարարության մասին

«Մենք ճիշտ ենք վարվում, երբ անընդհատ շեշտում ենք ազատագրված տարածքներ եզրույթը, քանի որ դա այդպես է: Ոչ ոք բարոյական իրավունք չունի նման հայտարարություն անել, մանավանդ` մի մարդ, ում երկիրը  ժամանակին, օրինակ` Մեքսիկայից օկուպացրել է Տեխաս կամ Կալիֆոռնիա նահանգները»,- անդրադառնալով ԵԱՀԿ Մինսկի խմբի ամերիկացի համանախագահ Ուորլիքի երեկվա` Ադրբեջանին տարածքներ հանձնելու վերաբերյալ հայտարարությանը`  ասաց Շուշիի առանձնակի գումարտակի ազատամարտիկ Արթուր Եղիազարյանը:

Նրա խոսքով` իհարկե, նման հայտարարությունն անարձագանք չպետք է թողնել, սակայն դրան այդքան կարևորություն տալն էլ ճիշտ չէ:

Շուշիի առանձնակի գումարտակի ուսանողական ջոկատի հրամանատար, ՀՅԴ ազատամարտիկների հանձնախմբի ատենապետ Իգոր Սարգսյանի կարծիքով` մենք նման հայտարարություններից չպետք է վատ զգանք, քանի որ մենք գիտենք մեր առաջնային խնդիրը, այն է` ազատագրված տարածքների պահպանումը և վերաբնակեցումը:

«Ժամանակ առ ժամանակ տարբեր քաղաքական գործիչներ, կախված իրենց պետության համար անհրաժեշտ իրավիճակից, շատ հայտարարություններ կանեն, որոնք մեր դուրը չեն գա, բայց դրանց չպետք է մեծ կարևորություն տանք»,- ասաց նա: