Եթե լավ մարզվեմ` մեծ հաջողությունների կհասնեմ. Հայկ Գալստյան

Հայտնել էինք, որ  «Միկա» -ի 16-ամյա ֆուտբոլիստ Հայկ Գալստյանն այս օրերին փորձաշրջան էր անցնում գերմանական «Հոֆֆենհայմ»-ում:  Լուրեր էին պտտվում, որ ֆուտբոլիստն արդեն պայմանագիր է ստորագրել ակումբի հետ:

Yerkir.am-ի թղթակիցը  կապ հաստատեց Գերմանիայում գտնվող Հայկի հետ:

-Ինչպե՞ս են ընթանում մարզումները և ինչպիսի՞ մթնոլորտ է թիմում:

-Մթնոլորտը շատ լավն է: Ֆուտբոլիստ-մարզիչ հարաբերությունները շատ ջերմ  են:  Արդեն 1 ամիս է` այստեղ եմ և ոչ մի դժվարության չեմ հանդիպել: Հարմարվել եմ ամեն ինչին: Մարզիչները շատ գոհ են: Նրանց խոսքով` եթե շարունակեմ լավ մարզվել` տարիներ հետո մեծ հաջողությունների կհասնեմ, իսկ ես պատրաստ եմ անել ամեն ինչ, որպեսզի հասնեմ իմ նպատակին՝ որպես հայտնի ֆուտբոլիստ ճանաչված լինեմ Եվրոպայում:

-Ո՞ր տարիքից ես սկսել զբաղվել ֆուտբոլով:  Ինչո՞ւ  ընտրեցիր այս սպորտաձևը:

-3 տարեկանից զբաղվում եմ ֆուտբոլով: Սկզբում ինձ մարզում էր հայրս, այնուհետև 6 տարեկանից հաճախեցի ֆուտբոլի դպրոց:

-Որտե՞ղ ես սկսել  մարզվել և ե՞րբ հայտնվեցիր «Միկա»-ում:

- Առաջին անգամ Հունաստանում եմ հաճախել ֆուտբոլի մարզադպրոց, այնուհետև,  երբ 7 տարեկան էի,  տեղափոխվեցինք Հայաստան, և մարզումներս շարունակեցի «Միկա»-ում:

-Պայմանագրի ստորագրման պահին ի՞նչ զգացում ապրեցիր:

- Թիմը պայմանագիր է կնքել ծնողներիս հետ, քանի որ, ՖԻՖԱ-ի կանոնադրության համաձայն, չի թույլատրվում 18-ը չլրացած ֆուտբոլիստի հետ պայմանագիր ստորագրել: Պայմանագիրը կնքված է 2 տարով: Մի բան եմ միայն զգում՝ պարտավորվածություն:

Երվանդ ՀԱԿՈԲՅԱՆ