Ստվերի դեմ պայքարի ուղղությամբ հասել ենք մեծ հաջողությունների. Գագիկ Խաչատրյանի ուշագրավ հայտարարությունները

Այսօր լրագրողների հարցերը ֆինանսների նախարար Գագիկ Խաչատրյանին վերաբերում էին նրա ունեցվածքին և բիզնեսներին: Գագիկ Խաչատրյանը նշեց, որ լրագրողները կարող են հետաքրքրվել, համապատասխան ապացույցներով հիմնավորել, նաեւ` այդ խնդիրներով զբաղվում է էթիկայի հանձնաժողովը, և այդ ամբողջ շղթայի մեջ լրագրողները լայն հնարավորություն ունեն ճշտելու իր բիզնեսների մասին ողջ ճշմարտությունը:

Ինչ վերաբերում է ֆինանսների նախարարության մեջ հարկային ու մաքսային կառույցների միավորմանը, նա նշեց. «Ինչո՞ւ եք գերագնահատում իմ ուժերը: Աշխարհում օպտիմալացման ծրագրերը կիրառվում են, և այդ «սուպերնախարար» բառից շատ չեմ անհանգստանում, սուպերնախարար նշանակում է նաև սուպերպատասխանատվություն»:

Նա նշեց, որ կառավարությունն իրականացնում է օպտիմալացման ծրագրեր, որի պրակտիկան աշխարհում կա, և ֆինանսների նախարարությունում հարկային ու մաքսային կառույցները միավորվել են ավելի արդյունավետ աշխատանքի նպատակով:

Խոսելով ստվերի դեմ պայքարի մասին` Խաչատրյանն ասաց. «Փորձելու ենք, հետևողականորեն անելու ենք ամեն ինչ, որ գործարար միջավայրը բարելավվի: Այ, որ լրագրողները ոչ նպատակային հոդվածներ են գրում, դա մեր կյանքը բարդացնում է: Այ, որ խոսում եք իմ բիզնեսների մասին, Հայաստանը փոքր երկիր է, բոլորը բոլորի մասին ամեն ինչ գիտեն, խորհուրդ եմ տալիս չխոչընդոտել, չխանգարել, և դուք կհամոզվեք, թե ինչ լավ գործեր ունենք արած: Մենք ստեղծել ենք մի համակարգ, որը անձերի հետ ոչ մի կապ չունի»:

Նախարարը նշեց, որ հիմա աշխատում են, որ ՓՄՁ-ները իրենց հավատան, ու վստահություն լինի: Նա շեշտեց, որ հիմա արտոնությունների շղթա են ուզում ստեղծել, որ հարկային դաշտն ընդլայնվի: Ստվերը վերացնելու հետ կապված` ասաց. «Դա մեր կառավարությունում քննարկված թեմա է, հասել ենք այնպիսի մի մակարդակի, որ պետք է տնտեսությունն աշխուժացնենք ու ստիպված ենք այդ քայլն անել: Ստվերի դեմ պայքարի ուղղությամբ հասել ենք մեծ հաջողությունների»: