Եթե անողնաշար ու վախկոտ լինենք, մեծ հաջողությունների չենք հասնի

Այսօր լրագրողների հետ հանդիպել էին մի խումբ արվեստագետներ, որոնք խոսեցին նաև այսօր ՀՀ կառավարության կայացրած որոշման մասին` Հայաստանի կողմից Արցախի անկախության ճանաչման հարցն ուղարկել ԱԺ:

«Հայկազունք» համույթի գեղարվեստական ղեկավար Գուսան Հայկազունի կարծիքով` մենք վաղուց պետք է այդ քայլն արած լինեինք: Ըստ նրա` միևնույն է, ոչ մի պետություն էլ մեզ «բանի տեղ չի դնում»: «Ռուսաստանը միշտ էլ խաբել է, Ադրբեջանը` հարձակվել: Բացի այդ` եթե մենք չենք ճանաչում Արցախի անկախությունը, ինչպե՞ս կարող ենք ստիպել, որ մյուսները ճանաչեն»,- ասաց Հայկազունը:

Գեղանկարիչ Նիկոլ Աղաբաբյանն էլ նշեց, որ շատ ուշացած բան է այս պահին նման քայլ անելը: «Մեր դիվանագիտությունը զրոյական մակարդակի է այս հարցում, և Հայաստանից դուրս մեր դեսպանները միայն անձնական հարցերով են զբաղվում: Եթե Արցախի անկախությունն էլ ճանաչենք, բայց շարունակենք նման դիվանագիտությամբ «առաջ գնալ», ոչնչի էլ չենք հասնի»,- ասաց նա:

Ըստ «Կարին» ավանդական երգի-պարի համույթի գեղարվեստական ղեկավար Գագիկ Գինոսյանի` Արցախի անկախությունը պետք չէ ճանաչել, այլ Հայաստանի և Արցախի վերամիավորումը հաստատել: Ըստ նրա` հայերը մեկ պետություն պետք է ունենան:

«Հայաստանն ու Արցախը երկու առանձին պետություն ներկայացնելը դիվանագիտական խաղ էր, և փորձը ցույց տվեց, որ այն սխալ խաղ էր, քանի որ դրանով ո'չ Ղարաբաղյան հարցին լուծում տրվեց, ո'չ ինչ-որ լուրջ առաջընթաց եղավ, իսկ հետընթաց կարող ենք համարել մեր տղաների զոհվելը, նրանց արյունը: Եթե դրսում մենք չենք կարողանում հայտարարել, որ Արցախը պատմական Հայաստանն է, ապա վաղը Արևմտյան Հայաստանի համա՞ր ինչ ենք անելու: Եթե այս հարցում անողնաշար ու վախկոտ լինենք, մեծ հաջողությունների դժվար թե հասնենք»,- ասաց Գինոսյանը:

Գրող, երգահան Քրիստ Մանարյանը համաձայնեց Գինոսյանի հետ` նշելով, որ Արցախը պետք է միավորվի Հայաստանի հետ և ցավալին այն է, որ նոր-նոր ենք գալիս այս համոզման: «Մյուս կողմից` եթե թշնամին կրակում է, պատ բարձրացնելով, հարցը չես լուծի, պետք է դու էլ հարձակվես ու նրան վերացնես: Միգուցե սա հեքիաթ թվա, բայց այլ կերպ ուղղակի անհնար է»,- ասաց նա: