Նախագահի հետ քաղաքական կոնսուլտացիաները դեռ չեն ավարտվել. Գալուստ Սահակյան

ԱԺ ՀՀԿ խմբակցության ղեկավար Գալուստ Սահակյանի կարծիքով` երեկ ՀՀԿ ԳՄ նիստից հետո չհնչեցվեց նոր վարչապետի անունը, որովհետև Սահմանադրությունը նախատեսում է, որ երկրի նախագահը պետք է հանդիպի քաղաքական ուժերի հետ, նրանց հետ անցկացնի քաղաքական կոնսուլտացիներ, որից հետո նոր հրապարակվի նոր վարչապետի մասին:

Yerkir.am-ի հետ զրույցում Գալուստ Սահակյանը նշեց, որ այդ կոնսուլտացիաները դեռևս չեն ավարտվել: Ըստ նրա` ՀՀԿ ԳՄ նիստում ամենաէական հարցը քաղաքական կոնսուլտացիների վերաբերյալ հարցն է եղել, նաև Սահմանադրության հետ կապված հայեցակարգի քննարկման հարցը: «Իմ կարծիքով` բավականին կառուցողական քննարկումներ են եղել քաղաքական ուժերի և նախագահի միջև»,- ասաց Սահակյանը:

Մեր այն հարցին` քննարկվե՞լ է վարչապետի թեկնածուների հարց, նա պատասխանեց, որ նման հարց չի քննարկվել:

Չնայած Գալուստ Սահակյանի նման հայտարարությանը, որ նախագահի հետ քաղաքական կոնսուլտացիաները դեռ չեն ավարտվել, հարկ է հիշեցնել, որ Սերժ Սարգսյանն արդեն հանդիպել է ՀՅԴ-ի, ԲՀԿ-ի եւ ՕԵԿ-ի հետ, «Ժառանգությունն» ու ՀԱԿ-ը հրաժարվել են այդ հանդիպումներից:

Հիշեցնենք, որ երեկ ՀՀԿ ԳՄ նիստից հետո ՀՀԿ մամլո խոսնակ Էդուարդ Շարմազանովը հայտարարել էր, թե հնարավոր է քաղաքական կոնսուլտացիաները կրկնվեն: