Ես ոչ թե սովորական քաղաքական գործիչ եմ, այլ հիմնադիրն եմ. Գալուստ Սահակյան

«Ինչպես ցանկացած քաղաքական ուժ, ես էլ որպես ՀՀԿ ներկայացուցիչ, առաջին այդ խոսքն են ասում, որ մեծամասնությունը մենք ենք կազմելու: Այդպես էլ ես եմ ասում: Եթե փոքրերը ասում են, մեծերը կասեն ու կասեն»,- ԱԺ-ում լրագրողների հետ զրույցում ասաց ԱԺ խոսնակ Գալուստ Սահակյանը՝ պատասխանելով այն հարցին, թե ինչպե՞ս է գնահատում ՀՀԿ-ի շանսերն առաջիկա ընտրություններում:

«Ըստ էության` մենք այսօր ոչ թե մտածում ենք առաջին փուլն անցնելու մասին, այլ գիտակցում ենք, որ ընտրությունները պետք է անցնեն այնպես, ինչպես մեր հասարակությունն է ուզում, և մեզ համար խնդիրն էլ դա է, որ օրինական ընտրություն անցկացվի»,-ասաց Սահակյանը:

Հարցին, թե մտահոգի՞չ չէ, որ սահմանային լարված իրավիճակում ՀՀԿ-ի ցուցակը գլխավորում է պաշտպանության նախարարը և պետք է զբաղվի ոչ թե պաշտպանության գործով, այլ քարոզչությամբ, նա պատասխանեց. «Սա նոր ընտրական կարգ է, և այստեղ խնդիրները չեն վերաբերում` ով է առաջին կարգում, ովքեր՝ ոչ: Քննարկել ենք և որոշել` առաջին տասնյակում լինեն մարդիկ, ովքեր հնարավորություն ունեն, ըստ ամենայնի, ներկայացնեն ՀՀԿ-ի գործունեությունը և զբաղվեն դրանով»:

Սահակյանն ասաց նաև, որ Վիգեն Սարգսյանի՝ պաշտպանության նախարարի գործը չի տուժի: «Չեմ կարծում, հիմնական գործը շտաբի ղեկավարի վրա է դրված, դա քաղաքացիական պաշտոն է, իսկ նա, բնականաբար, այդ ամեն ինչը տեսնում է, հետևում է և փորձում է լուծումներ տալ: Ըստ էության` իհարկե դժվար է, բայց ասեմ, որ նա առավոտվանից մինչև կեսգիշեր աշխատանքի մեջ է»,- ասաց նա:

Անդրադառնալով ՀՀԿ-ի նախընտրական ցուցակում իր զբաղեցրած տեղին` Սահակյանն ասաց. «Եթե անգամ ես ցուցակում էլ չլինեմ, իմ տեղն այնպիսին է, որ մշտապես կա, այնպես որ` ես ոչ թե սովորական քաղաքական գործիչ եմ, այլ հիմնադիրն եմ, կուսակցության մեջ այդպես էլ ընդունվում է: Էնպես չէ, որ խնդիրը հետևյալն է, որ ես անպայման պետք է պատգամավոր դառնամ, խնդիրն այն է, որ ես այնպես մնամ, ինչպես եկել եմ և կարողանամ մինչև վերջ փորձեմ անել այն աշխատանքը, որ դրված է իմ վրա»:

Սահակյանի խոսքով՝ Սերժ Սարգսյանի մատնանշած նոր քաղաքական մշակույթը ու նոր քաղաքական դեմքերի մասին բարձրաձայնելը չի նշանակում միայն երիտասարդների ներառում: «Նոր մշակույթ չի նշանակում երիտասարդություն, երիտասարդները պետք է կարողանան ինչ-որ մի բան ստեղծել, որ հետո կարողանան տեր կանգնել: Նոր դեմք ասելով՝ չենք հասկանում մարդիկ, որոնց ոչ մեկ չի ճանաչում»,- ասաց նա:

«Եթե որևէ մեկը կասի, որ ես շատ ավելի մեծ քաղաքական գործիչ եմ, ինչպես Գալուստ Սահակյանն է, կարծում եմ՝ իմ տեղը կզիջեմ իրեն: Շատ կուզենայի ընտրություններից հետո լինել ԱԺ նախագահ, բայց եթե չլինեի, ով որ լինի անպայմանորեն կլինի իմ համաձայնությունը»,- եզրափակեց ԱԺ նախագահը: