Հասունացել էր մի պահ, որ Արմեն Սմբատյանը պետք է մշակույթի նախարար նշանակվեր. Լևոն Մութաֆյան

Խոսակցությունները, թե ՀՀ մշակույթի նախարար Հասմիկ Պողոսյանը օպերայի թատրոնի տնօրենի պաշտոնն իր համար է պահում, իրական հիմք ունեն. լրագրողների հետ զրույցում կարծիք հայտնեց թատերագետ Լևոն Մութաֆյանը: Ըստ նրա` գուցե հենց այս պատճառով էլ գաղտնի են պահվում ինը թեկնածուներից երեքի անունները:

Մութաֆյանը բացառեց Արմեն Սմբատյանի` օպերայի թատրոնի տնօրեն դառնալու հնարավորությունը: «Մի պահ էր հասունացել, որ Արմեն Սմբատյանը պետք է մշակույթի նախարար նշանակվեր, սակայն Սմբատյանի դրսի ընկերները մեր նախագահի առջև խնդիր դրեցին, որ Սմբատյանը դառնա ՄՄ-ում մեր ներկայացուցիչը, այնպես որ` Սմբատյանն իր գործն ունի: Մեծն Բարսեղ Թումանյանն էլ, կարծում եմ, իշխանությունների թեկնածուն չէ, քանի որ նրանց պետք է մեկը, ով կանի իրենց ասածը: Իշխանությունների հովանավորյալն է Կամերայինի տնօրենը` Արման Ծատուրյանը: Սակայն, կարծում եմ, այն երեք թեկնածուների մեջ ինչ-որ մեկը կա, որի համար էլ ծածուկ են պահվում նրանց անունները»,- ասաց նա: