Հայրս մենակ է եղել հյուրանոցում, մահացել է սրտի կաթվածից. Անահիտ Մութաֆյան

Թատերագետ Լևոն Մութաֆյանը, դատաբժշկական փորձաքննության արդյունքներով, մահացել է սրտի կաթվածից: Այս մասին yerkir.am-ի հետ զրույցում հայտնեց նրա դուստրը` Անահիտ Մութաֆյանը:

Անահիտը նշեց նաև, որ իրականությանն ամենևին էլ չեն համապատասխանում որոշ լրատվամիջոցներում տարածվող լուրերը, թե հայրը հյուրանոցում մենակ չի եղել: «Նա մենակ է եղել, մահացել է սրտի կաթվածից: Հասկանո՞ւմ եք, որ յուրաքանչյուր` ոչ հավաստի լուր այս պահին ավելի է մեզ ցավ պատճառում»,- ասաց նա:

Հիշեցնենք, որ Մութաֆյանի դին հայտնաբերվել էր «Աստորիա» հյուրանոցի լոգարանում: Yerkir.am-ի հետ զրույցում հյուրանոցի տնօրեն Երվանդ Խանավդալյանը հայտնել էր, որ Մութաֆյանն իրենց մոտ էր եկել` լողանալու: