Գլխավոր դատախազը սպասում է դատարանի` Բուդաղյանների գործով վճռին

«Բուդաղյանների գործը դատական քննության փուլում է, եւ հիմա դատարանի որոշման ակնկալիքով բոլորս էլ սպասում ենք»,- լրագրողներին այսօր կառավարությունում ասաց ՀՀ գլխավոր դատախազ Գեւորգ Կոստանյանը` պատասխանելով Բուդաղյանների գործի ընթացքի վերաբերյալ հարցերին:

Գլխավոր դատախազը նշեց, թե իրենք իրենց դիրքորոշումն այդ գործի առնչությամբ արդեն հայտնել են, համապատասխանաբար` այդ որոշումների օրինականությունը ստուգելու եղանակով, եւ հիմա այդ որոշումների օրինականությունը վիճարկվում է դատական կարգով: Դատարանի որոշումից հետո, ըստ Կոստանյանի, նոր միայն հնարավորություն կլինի այլ իրավական ընթացակարգերի մասին խոսելու:

Լրագրողների դիտարկմանը, թե մամուլում շրջանառվեցին խոսակցություններ, որ Գեւորգ Կոստանյանի` գլխավոր դատախազ նշանակվելու հանգամանքը կապված էր հենց այդ գործի հետ, գլխավոր դատախազը պատասխանեց. «Ես անհեթեթությունները երբեք չեմ մեկնաբանում»: