Ստորության գագաթնակետ (լրացված)

Այսօր Հայաստանի մշակույթի փոխնախարար Արթուր Պողոսյանն այցելել է Ազատության հրապարակ եւ ՀԱԿ անդամ Արամ Մանուկյանին է փոխանցել ՀՀ ժողովրդական արտիստ Վանուշ Խանամիրյանի մահվան կապակցությամբ ստեղծված հանձնաժողովի խնդրանքը` հոկտեմբերի 8-ին` ժամը 11:00-14:00-ը, հրապարակից դուրս բերել շուրջօրյա հանրահավաքի համար տեղադրված վրանները:

Փոխնախարար Պողոսյանը նաեւ Մանուկյանին փոխանցել է, որ դա հարկավոր է ժողովրդական արտիստի քաղաքացիական հոգեհանգստի անցկացումը պատշաճ կատարելու համար:

Սակայն, խնդրանքին ի պատասխան, Արամ Մանուկյանը փոխնախարար Պողոսյանին ասել է, որ ՀԱԿ-ը հարցն արդեն քննարկել է եւ որոշել, որ վրանները չեն տեղաշարժվելու:

Ինչպես yerkir.am-ին տեղեկացրեց Ա.Պողոսյանը, ՀԱԿ-ի հետ բանակցություններն այժմ էլ շարունակվում են, թեեւ ՀԱԿ-ից տեղեկացրել են, որ լավագույն դեպքում իրենք պատրաստ են միջանցք բացել եւ վրանները մի քիչ աջ եւ ձախ շարժել:

«Այսօր կրկին նիստ կգումարենք եւ, եթե ՀԱԿ-ն այդպես էլ համաձայնության չգա, կփորձենք այլ տարբերակներ գտնել: Ես ներքին համոզմունք ունեի, որ իրենք ըմբռնումով կմոտենան իրավիճակին, բայց նման վարվելակերպը բարոյականության տեսանկյունից անհասկանալի է ինձ համար»,- ասաց Պողոսյանը: