Նախարարը ''լղոզեց'' գազային կախվածությունից ազատվելու մասին հարցի պատասխանը

ԱԺ-ում 2014թ. բյուջեն ներկայացնելու ժամանակ ԱԺ ՀԱԿ խմբակցության ղեկավար Լևոն Զուրաբյանը ֆինանսների նախարար Դավիթ Սարգսյանից հետաքրքրվեց, թե կառավարությունը մշակո՞ւմ է որևէ ծրագիր գազային կախվածությունից հնարավորինս ազատվելու և այլընտրանքային էներգիայի աղբյուրները օգտագործելու ուղղությամբ: Պատգամավորը նաեւ հետաքրքրվեց, թե ինչքա՞ն են նվազել օտարերկրյա ներդրումները` կապված երկրում կոռուպցիայի հետ:

Դավիթ Սարգսյանը պատասխանեց, որ արտաքին տնտեսական գործոնները և գազի գնի բարձրացումը դեռևս բացասաբար են անդրադառնում տնտեսական աճի վրա: Նա նշեց, որ հիդրոէներգետիկայի շահագործման և էներգախնայողության բնագավառում շարունակվում է հետևողական քաղաքականությունը: «Օտարերկրյա ներդրումների նվազում առկա է վերջին տարիներին, դա տարբեր պատճառներ կարող է ունենալ, բայց կապել դրանք կոռուպցիայի մակարդակի հետ, չի կարելի»,- ասաց նախարարը:

Լևոն Զուրաբյանը, արձագանքելով նախարարի պատասխանին, նշեց, որ նախարարը ցույց տվեց դասական օրինակ, թե ինչպես պետք է խուսափել կոնկրետ պատասխաններից: «Աբսուրդ է պարտատոմսերը ներկայացնել որպես օտարերկրյա ներդրումներ, խոսքը գնում է բիզնես ներդրումների մասին, այնպես որ` Ձեր պատասխանն անհեթեթ էր»,- ասաց պատգամավորը: