Ռուսաստանն Իսրայելին խնդրել է չզինել Ադրբեջանին

Իսրայելի ԱԳՆ-ն Ռուսաստանի խնդրանքով որոշակի փոփոխություններ է կատարել Ադրբեջանին զենք մատակարարելու մասին համաձայնագրում. հայտնում է haqqin.az-ը՝ վկայակոչելով շվեյցարական İSN գործակալությունը:

Ըստ գործակալության՝ խոսքը հարձակողական սպառազինությունների որոշ տարրերի մատակարարման դադարեցման մասին է։

Ադրբեջանական ԶԼՄ-ները, սակայն, գրում են, որ այսօր Իսրայելում ոչ ոք չի կարող վստահորեն ասել, թե շվեյցարական լրատվամիջոցի տարածած տեղեկատվությունը տեղի ունեցած փաստ է, թե` քաղաքական միստիկա:

Լեհաստանի Միջազգային հարաբերությունների ինստիտուտի վերլուծաբան Մարտին Պիոտրովսկու կարծիքով՝ Ռուսաստանը մտադիր չէ փոխել ուժերի հավասարակշռությունը տարածաշրջանում, այդ իսկ պատճառով խնդրել է իսրայելական կողմին` փոփոխության ենթարկել իր ռազմական համաձայնագիրն Ադրբեջանի հետ։