Երկնքից երեք` նոր ու հյուղեթ խնձորներ կընկնեն

Սեպտեմբերի 20-22-ը Հովհաննես Թումանյանի տուն-թանգարանում կանցկացվի «Երկնքից երեք խնձոր ընկավ...» հեքիաթասացության եւ բարբառի 5-րդ մրցույթ-փառատոնը:

Yerkir.am-ի հետ զրույցում թանգարանի տնօրեն Նարինե Թուխիկյանը նշեց, որ փառատոնին մասնակցելու հայտեր են ներկայացրել Արագածոտնի, Կոտայքի, Գեղարքունիքի, Շիրակի, Տավուշի մարզերը, ՀՀ-ում բնակվող քրդական, վրացական, գերմանական, եզդիական, լեհական համայնքները, Սիրիայի, Լիբանանի, Վրաստանի, ինչպես նաեւ արեւմտահայ համայնքի ներկայացուցիչներ:

«Այս տարի փառատոնի կարգը որոշակի փոփոխություններ է կրել. հայ մասնակիցները, կպատմեն հեքիաթներ համաշխարհային գանձարանից, իսկ ազգային համայնքները` Թումանյանի կամ Թումանյանի թարգմանած հեքիաթները` իրենց բարբառով: Մասնակիցները հայերեն բարբառներով կներկայացնեն բելառուսական, գերմանական, ճապոնական, ռուսական, վրացական, իռլանդական, անգլիական, բուլղարական, ֆրանսիական հեքիաթներ»,- ասաց Թուխիկյանը:

Հիշեցնենք, որ վերջերս փառատոնը հաղթող է ճանաչվել ԻԿՕՄ-ի /Թանգարանների միջազգային կոմիտե/ գագաթաժողովի շրջանակներում իրականացվող` ՍԵԿԱ-ի /ԻԿՕՄ-ի Կրթության եւ մշակութային գործունեության միջազգային կոմիտե/ հայտարարած «Լավագույն փորձ» մրցույթում (Best Practice AWARD)՝ ընդգրկվելով «5 լավագույն փորձ» ծրագրերի շարքում: