Այնպես չէ, որ իմ պագոնները կընկնեն, բայց պետք է հաշվի առնել ՕԳԳ-ն. Շարմազանով

ԱԺ փոխնախագահ Էդուարդ Շարմազանովը, Yerkir.am-ի հետ զրույցում խոսելով իր` ՀՀԿ ռեյտինգային կամ համապետական ցուցակում ընդգրկվելու մասին, նշեց, որ թիմային խաղացող է և երբեք ինքը չի որոշում, թե որ ցուցակով կընդգրկվի:

«Պետք է նայենք արդյունավետությանը, ո՞րն է արդյունավետ: Ռեյտինգը նա է, որ այնտեղ ընդգրկվեն մարդիկ, ովքեր տեղում ավելի ակտիվ են: Ես ավելի ակտիվ եղել եմ պառլամենտում»,- ասաց ԱԺ փոխնախագահը:

Ըստ Շարմազանովի` և' ռեյտինգային ցուցակով ընտրված պատգամավորի, և' համապետական ցուցակով ընտրված պատգամավորի մանդատի գույնը նույնն է: «Մանդատի գույնը նույնն է: Այստեղ ֆունկցիայի խնդիրն է` քաղաքական գիծ ես պահում:  Այնպես չէ, որ իմ պագոնները կընկնեն, բայց պետք է հաշվի առնել ՕԳԳ-ն»,- նշեց նա:

Շարմազանովը նույնիսկ կատակեց` նշելով, որ Իկեր Կասիլիասն ու Բուֆոնը ֆանտաստիկ դարպասապահներ են, բայց երբ նրանց դնես որպես կենտրոնական հարձակվող, նրանց ՕԳԳ-ն կիջնի, դրա համար իր ընդունակությունները  պետք է օգտագործել այնտեղ, որտեղ ավելի վառ են դրսևորում:

Նշենք, որ մամուլում լուրեր են տարածվել, թե Էդուարդ Շարմազանովին ցանկանում են ընդգրկել ՀՀԿ ռեյտինգային ցուցակում, ինչը դուր չի գալիս ԱԺ փոխնախագահին: