''Շախտյոր''-ի հետ պայմանագիրը խզելու դեպքում Մխիթարյանը պարտավոր է վճարել 30 մլն դոլար տուգանք

Դոնեցկի «Շախտյոր»-ի գլխավոր տնօրեն Սերգեյ Պալկինը football.ua-ին տված բացառիկ հարցազրույցում անդրադարձել է նաև Հայաստանի ազգային հավաքականի և դոնեցկյան ակումբի կիսապաշտպան Հենրիխ Մխիթարյանին:

«Ես բազմիցս նշել եմ, որ Մխիթարյանի համար պաշտոնական առաջարկ ստացել ենք միայն Դորտմունդի «Բորուսիա»-ից: Դա միակ առաջարկն է: Մխիթարյանի պայմանագրի մեջ նշված չի եղել փոխհատուցման գումար, սակայն պայմանագիրը միակողմանի խզելու դեպքում նա պարտավոր է ակումբին վճարել 30 մլն դոլար տուգանք: Գումարը վճարելուց հետո կարող է  գնալ այնտեղ, որտեղ կցանկանա»,- նշել է Պալկինը:

Հարցին, թե ի՞նչ կլինի Մխիթարյանի հետ, երբ նա որոշի վերադառնալ, ակումբի տնօրենն ասել է. «Իհարկե Մխիթարյանը կպատժվի: Նա չի միացել հավաքներին: Պայմանագրի մեջ նշված են բոլոր պատժամիջոցները, այնպես որ` դա խնդիր չէ մեզ համար»: