Սեդրակյանի խափանման միջոցը մնաց անփոփոխ

Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Գագիկ Պողոսյանը, մոտ երկու ժամ սպասեցնելով դատավարության մասնակիցներին, քիչ առաջ դուրս եկավ խորհրդակցական սենյակից և  մերժեց  ՀՀ նախագահի նախկին թեկնածու Պարույր Հայրիկյանի դեմ մահափորձի գործով մեղադրյալ Վարդան Սեդրակյանի փաստաբան Ալեքսանդր Սիրունյանի միջնորդությունը:

Հիշեցնենք, որ Սիրունյանը դատարանին միջնորդել էր  գրավի դիմաց ազատ արձակել իր պաշտպանյալին' հաշվի առնելով, որ նրա մեղադրանքի հիմքում ապացույցներ չկան: Ավելին, նա հայտնել էր, որ Սեդրակյանը տառապում է քրոնիկ հեպատիտ հիվանդությամբ, խնամքի տակ ունի 2 անչափահաս երեխա, ինչպես նաև' մայրը, կինը: Փաստաբանը միջնորդել էր խափանման միջոցը փոխել ազատությունից չզրկելու հետ կապված ցանկացած որոշման հետ: