Դատարանն անփոփոխ թողեց ֆիզկուլտուրայի ուսուցչի նկատմամբ կիրառված խափանման միջոցը

Այսօր ՀՀ քրեական դատարանն անփոփոխ թողեց նոյեմբերի 5-ին Մաշտոցի պողոտայում տեղի ունեցած անկարգությունների գործով կալանավորված Սևակ Մնացականյանի նկատմամբ կիրառված խափանման միջոցը: Այս մասին yerkir.am-ի հետ զրույցում հայտնեց Սևակի պաշտպան Անդրանիկ Աբաջյանը:

Հիշեցնենք, որ Սևակ Մնացականյանը Երևանի թիվ 147 ավագ դպրոցի ֆիզկուլտուրայի ուսուցիչն է, նրան մեղադրանք է առաջադրված ՀՀ ՔՕ 316-րդ հոդվածի 1-ին մասի հատկանիշներով ( Իշխանության ներկայացուցչի կամ նրա մերձավոր ազգականի նկատմամբ կյանքի կամ առողջության համար ոչ վտանգավոր բռնություն գործադրելը կամ բռնություն գործադրելու սպառնալիքը՝ կապված նրա կողմից իր ծառայողական պարտականությունները կատարելու հետ): Նշված հոդվածը նախատեսում է պատիժ տուգանքով՝ նվազագույն աշխատավարձի երեքհարյուրապատիկից հինգհարյուրապատիկի չափով կամ կալանքով՝ առավելագույնը մեկ ամիս ժամկետով կամ ազատազրկմամբ՝ առավելագույնը հինգ տարի ժամկետով:

Նշենք, որ այս գործով կալանավորված Շանթ Հարությունյանին էլ երեկ ուշ երեկոյան տեղափոխել են հոգեբուժարան՝ դատաբժշկական փորձաքննության ենթարկելու: