Մեծարգո նախագահն ինձ նկատի ուներ. Վարդան Սեդրակյան

Գործող նախագահ, նախագահի թեկնածու Սերժ Սարգսյանը «Ազատություն» ռադիոկայանին տված հարցազրույցում հայտարարել էր, որ անորոշությունից եւ անէությունից միանգամից չեն գալիս եւ ասում` ես նախագահ եմ դառնալու, քանի որ նախագահ են դառնում թիմով, անցած ճանապարհով: Նախագահի մեկ այլ թեկնածու, էպոսագետ Վարդան Սեդրակյանը համոզված է, որ Սերժ Սարգսյանը ակնկարկել է հենց իրեն:

«Մեծարգո պատվարժան նախագահը նկատի է ունեցել ինձ, քանի որ մյուս բոլոր թեկնածուները իր համար որոշակի կենսագրություն ունեն: Հայրիկյան- Հովհաննիսյան- Բագրատյան եռյակը գործում է նրա բարձր հովանու ներքո»,- հայտարարեց Սեդրակյանը:

Անդրադառնալով Անդրիաս Ղուկասյանին` էպոսագետ թեկնածուն հայտարարեց, որ նա առայժմ փորձում է քաղաքական քայլեր կատարել:

Նա հայտարարեց նաեւ, որ գովազդային վահանակի մեկ կողմը ամսական 15 հազար դոլար է, իսկ նախագահի թեկնածու Րաֆֆի Հովհաննիսյանը նման 117 վահանակ է պատվիրում: «Ինչո՞ւ չեք հարցնում` որտեղի՞ց Րաֆֆի Հովհաննիսյանին այդ փողերը»,-հայտարարեց Սեդրակյանը:

Նա նաեւ վստահեցրեց, որ գործող նախագահը, չունենալով մոսկովյան եւ այլ «դաբրոներ», ամեն գնով որոշել է ստանձնել նախագահի պաշտոնը, բայց չի ստացվի:

Հարցին` եթե, այդուհանդերձ, չընտրվեք, ի՞նչ եք անելու, Սեդրակյանը պատասխանեց. «Ես ձեր չափ երեւակայություն չունեմ, որ նման բան պատկերացնեմ»: