Լևոն Տեր-Պետրոսյանը ներկա չէր Մարտի 1-ի զոհերի հիշատակին նվիրված պատարագին

Քիչ առաջ Սուրբ Սարգիս եկեղեցում Մարտի 1-ի զոհերի հիշատակին նվիրված պատարագ մատուցվեց, որին ներկա էին «Ժառանգություն» և ՀԱԿ խմբակցությունների պատգամավորներ, քաղաքացիներ:

Պատարագին ներկա չէր ՀԱԿ առաջնորդ, ՀՀ առաջին նախագահ Լևոն Տեր-Պետրոսյանը:

Լրագրողների հետ ճեպազրույցի ժամանակ ԱԺ ՀԱԿ խմբակցության պատգամավոր Նիկոլ Փաշինյանը, անդրադառնալով Մարտի 1-ին, նշեց, որ իր համար Սերժ Սարգսյան և Ռոբերտ Քոչարյան անուններով նախագահներ չեն եղել, և լրագրողներին հորդորեց նրանց մասին հարցնելիս չնշել նախագահ բառը:

«Մարտի 1-ի ոճրագործության բացահայտման հարցը օրինականության հարց է: Դրա պատասխանատվությունը կրում են պետական հեղաշրջում իրականացրած և իշխանության եկած մարդիկ: Մարտի 1-ի հարցը դուրս չի գա օրակարգից, քանի դեռ չեն բացահայտվել իրական մեղավորները»,- հայտարարեց պատգամավորը:

Ըստ նրա` այդ խնդիրը կլուծվի այն ժամանակ, երբ Հայաստանում հաստատվի ժողովրդավարական իշխանություն: