ՀԱԿ-ը, "Հայ ֆեստ"-ն ու Կիպելովը

«Հայ ֆեստ» 9-րդ միջազգային թատերական փառատոնի շրջանակներում երեկ Ազատության հրապարակում պետք է բացօթյա ցուցադրություն լիներ:

Ինչպես yerkir.am-ին տեղեկացրին «Հայ ֆեստ»-ից, «Միհր» թատրոնի «Սեւ ամրոց» ներկայացումը հանվել է փառատոնի խաղացանկից, քանի որ Ազատության հրապարակում երեկ բոլորովին այլ ներկայացում էր ցուցադրվում:

Մինչ ՀԱԿ-ն ու իր համախոհները Ազատության հրապարակում լսում էին «Արիա» խմբի «Я свободен» («Ես ազատ եմ») երգը եւ փորձում երգին համահունչ ճառեր հորինել` որոշ մարդիկ բանից անտեղյակ նույնպես գնացել էին Ազատության հրապարակ` «Հայ ֆեստ»-ի շրջանակներում բացօթյա ներկայացում դիտելու:

Նրանք, այնուամենայնիվ, դժգոհ չեն մնացել, քանի որ ՀԱԿ-ի կողմից կազմակերպված ներկայացումն են դիտել, որը թեեւ խաղացանկային չէր, բայց լավ էր բեմադրվել...