Թուրքիան պետք է հետեւի Գերմանիայի օրինակին եւ ճանաչի Հայոց ցեղասպանությունը

Գերմանացի հասարակական գործիչ, հոգեւորական, արեւելագետ Յոհաննես Լեփսիուսը երկար տարիներ զբաղվել է Հայկական հարցով: Նա իր աշխատություններում ապացուցել է, որ Արեւմտյան Հայաստանում եւ Օսմանյան կայսրության հայաբնակ վայրերում Առաջին աշխարհամարտի ժամանակ իրագործվել է հայերի ցեղասպանություն:

Սեպտեմբերի 26-ին աշխատանքային այցով Գերմանիայում գտնվող Ազգային ժողովի նախագահ Հովիկ Աբրահամյանի գլխավորած պատվիրակությունը Պոտսդամում այցելել է Յոհաննես Լեփսիուսի տուն-թանգարան: Տնօրեն Հանց-Ուլրիխ Շուլցը ԱԺ նախագահին ներկայացրել է Լեփսիուսի կյանքն ու գործունեությունը, նաեւ նվիրել նրա` «Հայ ժողովրդի վիճակը Թուրքիայում» աշխատությունը:

ԱԺ նախագահը նշել է, որ  պատմական արդարության վերականգնումը Հայաստանը կարեւորում է երկու հարեւան երկրների միջեւ վստահության մթնոլորտի բարելավման համատեքստում: «Թուրքիան պետք է հետեւի Գերմանիայի օրինակին, որ ճանաչեց Հոլոքոստը` որպես պատմական իրողություն, եւ ճանաչի Հայոց ցեղասպանությունը»,- ասել է Հովիկ Աբրահամյանը:

Հանդիպման վերջում ԱԺ նախագահը գրառում կատարեց պատվավոր հյուրերի գրքում. տեղեկացնում է ԱԺ հասարակայնության եւ տեղեկատվության միջոցների հետ կապերի վարչությունը: