ԱՄՆ նախագահը պետք է հետևի Սենատի օրինակին. ՄԱԿ-ում ԱՄՆ-ի նախկին դեսպան

ԱՄՆ նախագահ Դոնալդ Թրամփը պետք է հետեւի Սենատի օրինակին և ճանաչի Հայոց ցեղասպանությունը. ըստ Yerkir.am-ի՝ իր թվիթերյան միկրոբլոգում նման գրառում է կատարել ՄԱԿ-ում ԱՄՆ նախկին դեսպան Սամանտա Փաուերը։

Նա, մասնավորապես, նշել է. 

«ԱՄՆ Սենատը հենց նոր ընդունեց Հայոց ցեղասպանությունը։ Նախագահ Թրամփը պետք է այժմ հետևի այդ օրինակին՝ բոլոր զոհերի, ցեղասպանությունը վերապրածների ու միլիոնավոր հայ-ամերիկացիների անունից, որոնք այդքան դժվարությամբ պայքարել են այս օրվա համար»:

Նախկին դեսպանը գրառմանը կից տեսանյութ է հրապարակել, որտեղ սենատոր Ռոբերտ Մենենդեսը բանաձևը Սենատին ներկայացնելիս հուզվում է։

«Մարդիկ, որոնք սկսել են բարոյազուրկ ձևով վերաբերվել պետական ծառայությանը, ծախսեք 30 վայրկյան, որպեսզի տեսնեք, թե ինչպես է սենատոր Մենենդեսը զսպում արցունքները, նախքան կավարտի ելույթը Սենատում։ Նա տասնամյակներ է աշխատել, որպեսզի սա տեղի ունենա»,- ամփոփել է նա: