Կարապահամար` Միացյալ Թագավորությունում

Միացյալ Թագավորությունում այսօր ավարտվելու է 12-րդ դարից ավանդաբար իրականացվող` Թեմզա գետի կարապների հաշվառումը: Այն սովորաբար կատարվում է հուլիսի երրորդ շաբաթվա ընթացքում:

Սպիտակաթույր թռչուններն արդեն քանի դար է` պատկանում են միապետին, եւ միջնադարյան Եվրոպայում կարապը թագավորական սեղանի ցանկալի ուտեստներից էր: Այդ թռչունների բազմացմամբ եւ հաշվառմամբ զբաղվում էր թագավորի անձնական շքախմբի հատուկ պաշտոնյան:

Ներկայումս այդ առաքելությունն իրականացնում է Օքսֆորդի համալսարանի կենդանաբանության ֆակուլտետի պրոֆեսոր Դեւիդ Բարբերը: Անցած 5 օրերի ընթացքում նա իր օգնականների հետ հաշվառել ու չափագրել է Թեմզայի ողջ երկայնքով լողացող թռչուններին` չափել է կտուցի երկարությունը, գլխի ծավալը, օղակավորել է կարապներին, անհրաժեշտության դեպքում նաեւ բուժել:

Ըստ Բարբերի` ներկայումս էլ կարապները համարվում են թագավորական թռչուններ, դրանց սպանելն արգելվում է: Հաշվառման ավարտից հետո պրոֆեսորը զեկույց է ներկայացնելու թագավորական պալատ:

Մի քանի տասնամյակ առաջ երկրի խորհրդարանում բարձրացվել էր թագավորական այդ արտոնության վերացման հարցը, սակայն մանրամասն քննարկումից հետո այդ ավանդույթը պահպանվեց` որպես կարեւոր բնապահպանական միջոցառում: