LulzSec-ը ինքնալուծարվել է

LulzSec կոչվող հաքերական խումբը, որն իր վրա է վերցրել երկու ամիս շարունակ ԱՄՆ Կենտրոնական հետախուզական վարչության, Հետաքննությունների դաշնային բյուրոյի եւ Սենատի կայքերի վրա հարձակումների պատասխանատվությունը, երեկ հայտարարել է ինքնալուծարման մասին. տեղեկացնում է Associated Press-ը:

«Մեր 50-օրյա շրջագայությունն ավարտվեց, եւ մենք մենք պետք է դեպի հեռուն լողանք»,- այս մետաֆորիկ հայտարարությունը հաքերները տեղադրել են Twitter-ում:

Ոչ պաշտոնական տեղեկությունների համաձայն` LulzSec-ը պատկանում է, այսպես կոչված` մոխրագույն հաքերների խմբին: Դրանք կիբերխուլիգաններ են. կայքերը ժամանակավորապես շարքից դուրս են բերում ոչ թե ֆինանսական շահույթ ստանալու, այլ դրանց անվտանգության մեջ առկա բացերը ցուցադրելու կամ վրեժ լուծելու նպատակով:

Այսպես` անցյալ շաբաթ խումբը սեփական հեռախոսային «թեժ գիծն» էր բացել, որի միջոցով կայքերի դեմ բողոքներ էր հավաքում: Եթե LulzSec-ի ղեկավարությունը որոշում էր, որ բողոքը տեղին է, գործի էր դրվում «ցանցային զենք»: