Տիգրան Փոստանջյանը ստիպված ընդունել է համաներումը

Այսօր Երեւանի Արաբկիր եւ Քանաքեռ-Զեյթուն համայնքների ընդհանուր իրավասության դատարանում, դատավոր Արթուր Մկրտչյանի նախագահությամբ, սկսվել է ՀՀ ԱԺ պատգամավոր, «Ժառանգություն» խմբակցության անդամ Զարուհի Փոստանջյանի եղբոր՝ Տիգրան Փոստանջյանի դեմ գործով դատական նիստը:

Մեղադրող Արամ Ամիրզադյանը հրապարակել է Տիգրան Փոստանջյանին ներկայացված մեղադրանքի վերաորակման մասին որոշում՝ հիմք ընդունելով քրեական օրենսգրքում փոփոխություններ եւ լրացումներ կատարելու մասին մայիսի 25-ից ուժի մեջ մտած օրենքը:

Գործով նախագահող դատավոր Արթուր Մկրտչյանը հայտարարել է, որ Տիգրան Փոստանջյանին ներկայացված հոդվածը, որը նախատեսում է մինչեւ 3 տարի ազատազրկում, ենթակա է ԱԺ-ի կողմից հայտարարված համաներման կիրառմանը: Ըստ դատավորի` ամբաստանյալը կարող է իրեն մեղավոր չճանաչել եւ չառարկել, որպեսզի համաներումն իր նկատմամբ կիրառվի:

Տիգրան Փոստանջյանը հայտարարել է, որ խնդրում է դատարանին` իրեն ազատ արձակել կալանքից, իսկ ինքը կապացուցի, որ անմեղ է, սակայն եթե պետք է մնա նվաստացուցիչ պայմաններում՝ կալանքի մեջ, ապա ստիպված է ընդունել համաներումը:

Ինչպես «Նոյյան Տապանին» հայտնել է Տիգրան Փոստանջյանի քույրը՝ պատգամավոր Զարուհի Փոստանջյանը, եղբայրը լուրջ առողջական խնդիրներ ունի:

Ի վերջո, դատարանի վճռով Տիգրան Փոստանջյանի դեմ քրեական գործը կարճվել է, նրա նկատմամբ քրեական հետապնդումը դադարեցվել է, ընտրված խափանման միջոց կալանքը` վերացվել: