Համաներումը մարդասիրական դրսեւորո՞ւմ

Համաներումը թե՛ ներքաղաքական լարվածությունը կթեթեւացնի, թե՛ հասարակական հարաբերությունները կբարելավի. լրագրողների հետ ահնդիպման ժամանակ համոզմունք հայտնեց ՀՀԿ խմբակցության պատգամավոր Կարինե Աճեմյանը: «Մեր քրեակատարողական հիմնարկներում գերբեռնված վիճակ է, այդ առումով նույնպես կթեթեւանա»,- ասաց նա` համաներումը մարդասիրական քայլ համարելով:

Մինչդեռ «Ժառանգություն» խմբակցության պատգամավոր Զարուհի Փոստանջյանի կարծիքով` համաներումը ոչ թե Հայաստան  իշխանությունների մարդասիրության դրսեւորում է, այլ «վատ օրից է գալիս»:

«Բանտախցերն այսօր գերծանրաբեռնված են, օրինակ` «Նուբարաշեն» քրեակատարողական հիմնարկը, որը նախնական կալանքի վայր է, նախատեսված է 800 կալանավորի համար, սակայն այնտեղ շուրջ 1300 մարդ է պահվում»,- հայտարարեց պատգամավորը:

Նրա համոզմամբ` տարիներով շարունակվող անարդարությունները հանգեցրել են նրան, որ հարկավոր է ինչ-որ բան անել, իսկ այդ ինչ-որ բանն էլ համաներում իրականացնելն է: