Ֆրանսիացի լրագրողին ազատ են արձակել սիրիական բանտից

Ֆրանսիական Le Monde թերթի եւ Radio France-ի ալժիրցի թղթակից Խալեդ Սիդ Մոհանդին ապրիլի 9-ին ձերբակալել էին Դամասկոսում եւ փորձել նրանից իմանալ այն ընդդիմադիրների անունները, որոնցից լրագրողը հարցազրույցներ էր վերցրել: Սիրիական բանտում 23 օր պահելուց հետո նրան ազատ են արձակել:

France 24 հեռուստաալիքին տված հարցազրույցում լրագրողը պատմել է, որ իրեն սկզբում մի քանի անգամ ծեծել են, սակայն հետո դադարեցրել են ծեծը` կիրառելով հոգեբանական ճնշումներ:

«Դրանք կտտանքների ենթարկված այլ ձերբակալվածների բղավոցներն էին, տնքոցները, որոնք կարծես դժոխքից լինեին: Երբեմն դա տևում էր 15 րոպե, երբեմն` 1 ժամ»,- պատմել է լրագրողը: